தென் கொரியாவில் இன்று புதிதாக 14 ஆயிரத்துக்கும் அதிகமானோருக்குக் கிருமித்தொற்று உறுதி செய்யப்பட்டுள்ளது. தொடர்ந்து மூன்றாவது நாளாக அங்கு, முன்னெப்போதும் இல்லாத அளவில் அதிகமானோருக்கு நோய்த்தொற்று அடையாளம் காணப்படுகிறது. சென்ற வாரம் அங்கு நாள்தோறும் புதிதாக நோய்த்தொற்று உறுதி செய்யப்பட்டோர் விகிதம் கிட்டத்தட்ட மூன்று மடங்கு குறைவாய் 3,800 ஆக இருந்தது. சுகாதாரப் பராமரிப்புக் கட்டமைப்பின் நெருக்கடியைத் தவிர்க்க, பரிசோதனையையும், தனிமைப்படுத்தும் வழிமுறைகளையும் அதிகாரிகள் மாற்றியமைத்துள்ளனர்.

ஜெர்மனியில் ஒரே நாளில் மேலும் 203,136 பேருக்கு கிருமித்தொற்று உறுதிசெய்யப்பட்டுள்ளது. அங்கு 24 மணி நேர இடைவேளையில் 188 பேர் கிருமித்தொற்றால் மாண்டனர். தினசரி தொற்றுச் சம்பவங்களின் எண்ணிக்கை உச்சத்தை எட்டியுள்ள வேளையில், அந்நாட்டு மக்கள் தடுப்பூசி போட்டுக்கொள்வதைக் கட்டாயமாக்குவது குறித்து ஜெர்மானிய அரசாங்கம் விவாதித்து வருகிறது. ஜெர்மனியின் மக்கள் தொகையில் 75 விழுக்காட்டினருக்குக் குறைந்தது ஒரு முறை தடுப்பூசி போடப்பட்டுள்ளது. இருப்பினும், மேற்கு ஐரோப்பிய நாடுகளான பிரான்ஸ், ஸ்பெயின், இத்தாலி ஆகியவற்றை விட அந்த விகிதம் குறைவானது என்று குறைகூறப்படுகிறது.

ஜப்பானில் கிருமித்தொற்று வேகமாய்ப் பரவி வருவதால் கடுமையான கட்டுப்பாடுகள் அறிமுகப்படுத்தப்பட்டுள்ளன. COVID-19 கிருமித்தொற்றுத் தொடங்கியது முதல் இப்போதுதான் முதன்முறையாக ஒரு நாளில் கிருமித்தொற்றுக்கு ஆளானோர் எண்ணிக்கை 71 ஆயிரத்தைத் தாண்டியுள்ளது. ஜப்பானியத் தலைநகர் தோக்கியோவில் மட்டும் 14 ஆயிரத்திற்கும் மேற்பட்டோருக்குக் கிருமித்தொற்று அடையாளம் காணப்பட்டுள்ளது. இந்நிலையில் ஒசாக்காவில், PCR பரிசோதனைக் கருவிகளுக்குப்  பற்றாக்குறை ஏற்பட்டுள்ளது.  அது மருத்துவத்துறைக்குப் பெரும் நெருக்கடியை ஏற்படுத்தியுள்ளதாகக் கூறப்படுகிறது. தொடர்ந்து நிலைமையைக் கண்காணித்து வருவதாக ஜப்பானிய அரசாங்கம் கூறியது. போதிய மருத்துவச் சாதனங்கள் இருப்பதை உறுதிசெய்ய உள்ளூர் அதிகாரிகளுடன் இணைந்து …

சீனாவில் நேற்று  புதிதாக 119 COVID-19 கிருமித்தொற்றுச் சம்பவங்கள் உறுதிசெய்யப்பட்டதாக அந்நாட்டுச் சுகாதார ஆணையம் தெரிவித்துள்ளது. நேற்று முன்தினம் (25 ஜனவரி) அந்த எண்ணிக்கை 44 ஆக இருந்தது. நேற்று பாதிக்கப்பட்டோரில் 25 பேர், உள்ளூரைச் சேர்ந்தவர்கள். ஏனையோர் வெளிநாட்டிலிருந்து வந்தவர்கள்.  மேலும் புதிதாகக் கிருமித்தொற்று அடையாளம் காணப்பட்ட 55 பேருக்கு எவ்வித அறிகுறிகளும் தென்படவில்லை என்று சீனா தெரிவித்தது. சீனாவில் மொத்தம் 105,811 கிருமித்தொற்றுச் சம்பவங்கள் பதிவாகியுள்ளன.