Year: 2020

சாயல்குடி:

கள்ளக்குறிச்சி மாவட்டம் சில்ஓடைபாலன்பட்டு கிராமத்தை சேர்ந்தவர் கபிவேல் மகன் தங்கமணி (வயது 20). இவர் அதே கிராமத்தை சேர்ந்த பிச்சை மகன் அபேல் என்பவர் சொந்தமாக வைத்திருக்கும், கதிர் அறுக்கும் எந்திரத்தில் வேலை செய்து வருகிறார்.

இந்தநிலையில் நேற்று சேரந்தை கிராமத்தை சேர்ந்த முத்திருளாண்டி என்பவருக்கு சொந்தமான வயலில் அறுவடை பணி நடைபெற்று கொண்டிருந்தபோது தங்கமணியின் வலது கால் எதிர்பாராதவிதமாக நெல் அறுவடை செய்யும் எந்திரத்தில் சிக்கியது. இந்த கொடுமையான விபத்தில் அவரது கால் சிதைந்து சின்னாபின்னமாகியது. அதில் வேதனையால் தங்கமணி துடிதுடித்தார்.

இதுகுறித்து தகவலறிந்த வாலிநோக்கம் போலீசார் சம்பவ இடத்துக்கு விரைந்து வந்து அவரை மீட்டு ராமநாதபுரம் அரசு மருத்துவமனைக்கு அனுப்பி வைத்தனர். இதுதொடர்பாக வாலிநோக்கம் போலீசார் வழக்குபதிவு செய்து விசாரித்து வருகின்றனர்.

சென்னை:

தமிழகத்தில் மாநில பாடத்திட்டத்தின் கீழ் செயல்படும் அரசு மற்றும் அரசு உதவி பெறும் பள்ளிகளில், இந்த ஆண்டு 5 மற்றும் 8 ஆம் வகுப்புகளுக்கான பொதுத்தேர்வு நடைபெறும் என்று பள்ளிக்கல்வி துறை அறிவித்தது.

இதற்கிடையில் நேற்று பள்ளிக்கல்வித்துறை அமைச்சர் செங்கோட்டையன் செய்தியாளர்களிடம் பேசிய போது, இந்த ஆண்டு நிச்சயமாக 5 மற்றும் 8 ஆம் வகுப்புகளுக்கு பொதுத்தேர்வு நடைபெறும் எனவும் அடுத்த ஆண்டு தேர்வை ரத்து செய்வது குறித்து பரிசீலிக்கப்படும் என்றும் தெரிவித்தார்.

இந்நிலையில், 5 மற்றும் 8-ம் வகுப்பு பொதுத்தேர்வுக்கு தடை கோரி ஐகோர்ட் மதுரை கிளையில் இன்று மனுதாக்கல் செய்யப்பட்டது. இதுதொடர்பாக வழக்கறிஞர் லூயிஸ் தொடர்ந்துள்ள மனுவில், 5,8-ம் வகுப்பு பொதுத்தேர்வு தொடர்பான தமிழக அரசாணையை சட்ட விரோதமானது என அறிவிக்க கோரி மனுதாக்கல் செய்துள்ளார். இந்த மனு மீது விரைவில் விசாரணை நடைபெறும் என தெரிகிறது.

சேலம்:

சேலம் குகை பகுதியை சேர்ந்தவர் சோமசுந்தரம் (வயது 56). இவர் குகை மாரியம்மன் கோவில் அருகே மளிகைக்கடை நடத்தி வருகிறார். சோமசுந்தரம் கடந்த 25-ந் தேதி இரவு வியாபாரம் முடிந்ததும் கடையை பூட்டிவிட்டு வீட்டுக்கு சென்றார். இந்த நிலையில் அவர் நேற்று முன்தினம் காலை கடையை திறப்பதற்காக சென்றார்.

பின்னர் அவர் கல்லாப்பெட்டியை திறந்து பார்த்த போது அதில் இருந்த ரூ.1½ லட்சத்தை காணாததால் அதிர்ச்சி அடைந்தார். இது குறித்து சோமசுந்தரம் செவ்வாய்பேட்டை காவல் நிலையத்தில் புகார் கொடுத்தார்.

அதன்பேரில் போலீசார் சம்பவ இடத்துக்கு விரைந்து சென்று விசாரணை நடத்தினர். அங்கு பொருத்தப்பட்டிருந்த கண்காணிப்பு கேமராவில் பதிவான காட்சிகளை போலீசார் ஆய்வு செய்தனர். அதில், கடையில் வேலை பார்த்து வரும் சிவகுமார்(48) மற்றும் அவருடைய மகன் கோபிநாத் (21) ஆகியோர் பணத்தை திருடி சென்றது தெரியவந்தது. இதையடுத்து அவர்கள் இருவரையும் போலீசார் கைது செய்து விசாரணை நடத்தினர்.

சிவகாசி:

சிவகாசி அனுப்பன்குளம் ஆண்டியாபுரத்தை சேர்ந்தவர் செல்வராஜ் மகன் வடிவேல்ராஜன் (வயது 42). இவருக்கு மனைவியும் 2 குழந்தைகளும் உள்ளனர். வடிவேல்ராஜன் சிவகாசியில் உள்ள ஒரு பள்ளியில் டிரைவராக வேலை செய்து வந்தார். இவர் கடந்த 2 ஆண்டுகளுக்கு முன்னர் சிவகாசியில் உள்ள ஒரு பிரபல பட்டாசு ஆலையில் டிரைவராக வேலை செய்த போது என்.லட்சுமியாபுரத்தை சேர்ந்த வீரலட்சுமி என்பவருடன் பழக்கம் ஏற்பட்டுள்ளது. வீரலட்சுமி கணவனை இழந்து குழந்தைகளுடன் வசித்து வந்துள்ளார்.

வடிவேல்ராஜன்-வீரலட்சுமி பழக்கம் வடிவேல்ராஜன் மகனுக்கு தெரியவந்தது. இதை தொடர்ந்து உறவினர்கள் வடிவேல்ராஜனிடம் பேசி வீரலட்சுமியுடனான பழக்கத்தை நிறுத்திக்கொள்ள வலியுறுத்தினர். ஆனால் அதற்கு வடிவேல்ராஜன் தான் வீரலட்சுமியுடன் சேர்ந்து வாழ விரும்புவதாகவும், அதற்கு குடும்பத்தினர் சம்மதிக்க வேண்டும் என்றும், மறுத்தால் தற்கொலை செய்து கொள்வதாக மிரட்டியதாக கூறப்படுகிறது. இந்த நிலையில் வீரலட்சுமியுடன் சேர்ந்து வாழ முடியாமல் தவித்த அவர் வீட்டில் வி‌ஷம் குடித்து தற்கொலை செய்து கொண்டதாக கூறப்படுகிறது.

இதை அறிந்த வடிவேல்ராஜனின் கள்ளக்காதலி என்.லட்சுமியாபுரத்தில் வீட்டில் சேலையால் தூக்குபோட்டு அவர் தற்கொலை செய்து கொண்டார். இது குறித்து அவரது தந்தை மாரிமுத்து சிவகாசி கிழக்கு காவல் நிலையத்தில் புகார் கொடுத்தார். வடிவேல்ராஜன் தற்கொலை தொடர்பாக அவரது மனைவி சிவகாசி கிழக்கு காவல் நிலையத்தில் புகார் கொடுத்தார். இந்த புகார்களின் பேரில் போலீசார் வழக்குப்பதிவு செய்து விசாரணை நடத்தி வருகிறார்கள்.

பெரம்பலூர்:

பெரம்பலூர் மாவட்டம், வேப்பந்தட்டை தாலுகா, வாலிகண்டபுரம், மாரியம்மன் கோவில் தெருவை சேர்ந்தவர் சுலைமான். இவர் குவைத் நாட்டில் வேலை பார்த்து வருகிறார். இவரது மனைவி நவாப் பீவி(வயது 34). இவர்களது வீட்டுக்கு செல்லும் பொதுப்பாதையை சிலர் ஆக்கிரமித்துக்கொண்டு பாதையை விட மறுத்து தடையை ஏற்படுத்தி வந்தனர்.

இதுகுறித்து நவாப்பீவி வேப்பந்தட்டை தாசில்தாரிடம் பலமுறை புகார் அளித்தும் நடவடிக்கை எடுக்கப்படவில்லை என்று கூறப்படுகிறது. இந்த நிலையில் நடவடிக்கை எடுக்காத அதிகாரிகளை கண்டித்து நேற்று காலை மாவட்ட கலெக்டர் அலுவலக வளாகத்தில் மண்எண்ணெயை தங்களது உடலில் ஊற்றி தீக்குளிக்க முயன்றனர்.

அப்போது கலெக்டர் அலுவலக பகுதியில் பாதுகாப்பு பணியில் இருந்த போலீசார் நவாப்பீவி உள்பட 3 பெண்களையும் தடுத்து நிறுத்தி, மண்எண்ணெய் கேனை பறிமுதல் செய்தனர். பின்னர் வருவாய்த் துறையினர் நவாப் பீவியிடம் பேச்சுவார்த்தை நடத்தி, பாதை பிரச்சினை தொடர்பாக அளவீடு செய்து பிரச்சினையை தீர்த்து வைப்பதாக உறுதியளித்தனர். இதையடுத்து 3 பெண்களும் அங்கிருந்து புறப்பட்டு சென்றனர்.

கிருஷ்ணகிரி:

கிருஷ்ணகிரி மாவட்டம் காவேரிப்பட்டணம் அருகே உள்ள மோட்டுகொல்லக் கொட்டாய் பகுதியை சேர்ந்தவர் கணேசன்(52), விவசாயி. இவர் தனக்கு சொந்தமான ரூ.15 ஆயிரம் மதிப்பிலான மொபட்டை கடந்த 27-ம் தேதி மாலை தனது வீட்னின் முன்பு நிறுத்தியுள்ளார். பின்னர் நேற்று காலை எழுத்து பார்த்தபோது, மொபட்டை காணவில்லை. இது குறித்து கணேசன் காவேரிப்பட்டணம் காவல் நிலையத்தில் புகார் அளித்தார். அந்த புகாரின் பேரில் போலீசார் வழக்குபதிவு செய்து விசாரணை நடத்தி வருகின்றனர்.